Fíos de prata Pop Up de ilustración no Couto.
Desde o 24 de Maio 2021 ata 24 Xuño 2021 tivemos unha mostra pop up marabillosa na tenda de Paloma “Cuadros y Molduras Marta”
A ilustradora e arquitecta Alba Fernández foi a primeira do que esperamos sexa un proxecto expositivo continuado a nivel local.
“Fíos de prata” (Folla de sala)
Alba Fernández observa o mundo desde unha burbulla translúcida que flota a ras do chan e ten un buraco cuns anteollos. Ela desde alí mira, analiza, debulla e, finalmente, ilustra un sentimento. O que Alba propón non é unha mostra de debuxos. É unha experiencia visual que case se confunde cun arrecendo familiar, coa lembranza táctil dun abrazo ou co sabor da auga salgada nun mergullo de fin de verán.
O simple dos seus trazos contrasta coa claridade da súa mensaxe. Delgados fíos que ilustran unha realidade de coidados, de ledicia e de liberdade. Fíos de prata que conforman unha vida posible.
Esta proposta artística invita aos espectadores a navegar por sentimentos e sensacións distintas e individuais. Son os ollos de cada un de nós os que activarán as obras e lles darán sentido.
Temos nestes escaparates cedidos por Paloma García Delgado, ao redor de 55 obras de pequeno formato delicadamente ilustradas con tinta china, lapis de cor, acuarela, gouache… e incluso unhas tesoiras.
Como método de ventas, usamos o método do punto colorado a tempo real:
“O xogo dos puntos colorados”
A mostra de ilustración “Fíos de prata” situarase en dous grandes escaparates a pé de rúa. Estes van cambiar de aspecto a tempo real, a modo de happening, coa participación das persoas afortunadas que adquiran un ou varios dos pequenos tesouros.
Cada ilustración contará cun punto colorado de substitución. No momento da compra, a obra sairá inmediatamente do escaparate e será substituída polo punto. Este cambio no escaparate, será feito pola propia persoa que compre e divídese en catro fases:
1- Escollerá a obra e pedirá un dos puntos colorados. Nese momento, o tempo detense e non poderá haber outra compra ata terminar o proceso.
2- Cun rotulador deixará constancia da súa compra cun parecer, un debuxo ou un pensamento escrito no punto colorado. Será un intercambio único que marcará un antes e un despois na súa relación artista/coleccionista.
3- Con axuda e supervisión de Paloma Delgado, xerente do local, retiran a obra escollida e colocan o punto colorado no seu lugar.
4- Nese momento, reactívase a mostra e os puntos colorados quedan a disposición do resto do público.
Desta maneira, a instalación irá continuamente mutando dándonos a oportunidade de experimentar o cambio de aspecto no espazo e no tempo.
E así mais ou menos foi:
